बैतडी: सेती नदीको जलस्तर बढेर बाढी बस्ती पस्न थालेपछि बैतडीको सिगासका ६० घरपरिवारलाई सुरक्षित स्थानमा सारिएको छ।
सिगास गाउँपालिका ५ ढुंगाडका ६० घर परिवारलाई स्थानीय शारदा माविमा सारिएको बैतडीका प्रमुख जिल्ला अधिकारी भीमकान्त शर्माले जानकारी दिनुभयो।
उहाँले भन्नुभयो,“ सेती नदी गाउँ पस्ने खतरा बढेपछि ढुंगाडका ६० घरपरिवारलाई सुरक्षित स्थानमा सारेका हौं। स्थानीय जनप्रतिनिधिको सहयोगमा उनीहरूलाई शारदा माविमा सारिएको छ।“
नदीमा बाढीको सम्भावना बढेसंगै उनीहरु पशुचौपायासहित घर छोडेर विद्यालयमा आश्रय लिएर बसेका हुन्।
अविरल वर्षाका कारण सेती नदीमा पानीको बहाव बढेपछि स्थानीयबासी त्रसित बनेका छन् । नदी किनारमा लगाएको तटबन्धमाथि जलस्तर पुगेपछि स्थानीयबासिन्दा घर छोड्न बाध्य भएका इन्द्रबहादुर चन्दले बताउनुभयो ।
सेती नदीमा पानीको बहाव बढ्दै गएपछि सिगास गाउँपालिका वडा नं– ५ का हरडाखानी, लाम्बगड, लोडे लगायतका बस्ती बाढीको उच्च जोखिममा परेका छन् । यस्तै वडा नं –६ का सेती किनारका बस्तीहरु पनि बाढीको जोखिममा परेका बताइएको छ ।
सेती नदीको बाढीले यहाँ बर्सेनि आतंक मच्चाउने गरेको छ।
यसअघि २०७८ कात्तिक पहिलो साता परेको बेमौसमी वर्षाले सिगास गाउँपालिका ५ ढुङगाड लगायत क्षेत्रमा सेती नदीको बाढी पस्दा ठुलो क्षति गरेको थियो ।
लगातार बर्षा भइरहेकाले जोखिम हुनसक्ने भन्दै सावधानी अपनाउन जिल्ला प्रशासन कार्यालयले आग्रह गरेको छ।
