काठमाडौँ:
नेपाल भलिबल लिग (NVL) को पहिलो संस्करणका लागि फ्रेन्चाइज टोली “कर्णाली शिवराज”ले आफ्नो मुख्य प्रशिक्षक (Head Coach) को घोषणा गरेको छ। कर्णाली शिवराजले नेपाली भलिबल क्षेत्रका अनुभवी प्रशिक्षक चन्द्र बहादुर कुँवरलाई आगामी सिजनका लागि टोलीको मुख्य रणनीतिकारको जिम्मेवारी सुम्पिएको हो।
आगामी भदौमा आयोजना हुन लागेको यस ऐतिहासिक पुरुष फ्रेन्चाइज लिगका लागि कर्णाली शिवराजले आफ्नो तयारीलाई तीव्र बनाएको छ। सोही तयारी स्वरूप आज आधिकारिक रूपमा मुख्य प्रशिक्षकको नाम सार्वजनिक गरिएको हो।
अनुभवी प्रशिक्षक चन्द्र बहादुर कुँवरले अब कर्णाली शिवराजको प्राविधिक र रणनीतिक कमान्ड सम्हाल्नुहुनेछ।
साख जोगाउने लक्ष्य: महिला भलिबलतर्फ ‘कर्णाली यशभिस’ले लगातार दुई पटक उपाधि जितेर बनाएको विरासतलाई अब पुरुष टोली ‘कर्णाली शिवराज’मार्फत पनि निरन्तरता दिने क्लबको लक्ष्य छ।
तयारी: मुख्य प्रशिक्षकको चयनसँगै टोलीले अब खेलाडीहरूको अक्सन (Auction) र बन्द प्रशिक्षण (Closed Camp) को तयारी सुरु गर्नेछ।
त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा हुने यस प्रतियोगितामा कर्णाली शिवराजसहित ६ वटा सहरका फ्रेन्चाइज टोलीहरूले उपाधिका लागि प्रतिस्पर्धा गर्दैछन्।
